راجل يملا العين

هو يعنى ايه راجل يملا العين ؟؟ يعنى ايه راجل مراته تحس انها مكتفية بيه تماما ومش محتاجة تبص لحد ولا تقارن حالها بحال حد

ولا تفكر فى اللى خطبوها قبل كدة ورفضتهم واللى كانو بيتمنوها وهى سابتهم واختارت دة بالذات علشان كانت فاهمة انه راجل يملا العين

ياترى هى الرجولة بس منحصرة فى العلاقة الزوجية .. وان الواحد طالما بيأدى حقوق الفراش يبقى كدة اسمه راجل يملا العين بيحصن مراته ويساعدها على غض البصر ومالى قلبها وعقلها وكيانها كله

هو الراجل لو مراته حست بالفراغ العاطفى وانحرفت بأى شكل ممنوع .. مش هيكون مسئول عنها قدام ربنا

لو كلمت حد على النت ولا موبايل ولا مشيت مع واحد .. هى مجرمة .. بس هو مش مقصر ولا عليه مسئولية ؟؟

هو اللى يسيب مراته مرمية فى البيت ويدور يلف مع اصحابه ويسهر معاهم

واللى يسيب مراته لأهله يبهدلوها وميجيبلهاش حقها علشان خايف يقولو عليه دلدول مراته

واللى يقعد يتفرج على أفلام زفت فى البيت ومش هامه ان عياله تشوف القرف بتاع ابوهم

واللى بيصرف على نفسه ويلبس ويتدلع وبعدين يستخسر يجيب طقم جديد لمراته ولا لإبنه

هو دة كدة ممكن نقول عليه راجل يملا العين

طيب سيبنا من كل دة

بس هى الواحدة اللى بتيجى تقول جوزى عينه زايغة وعاوزة تتقلع من مكانها .. مش بنقعد نقول لها البسى واتشيكى وزغللى عينه واتنططى علشان تعجبيه وتحصنى فرجة وتملى عينه

ليه فيه مبرر للراجل انه يبص برة وجوة ويشوف أفلام بحجة انه متجوز غفير ومش زى بتوع الأفلام والمسلسلات

وفى نفس الوقت عمر الراجل ما بيفكر ازاى يملا عين مراته

المهم انه بيصرف عليها ويجيب لها تاكل .. اصل هيا كانت هتجوع من غيره ,, لأ وكمان بينام معاها وخلاها تخلف أهى ماهى مكانتش هتعرف تخلف لوحدها

غير كدة هو معندوش أى عيب ولا نقص ولا مسئولية

والواحدة المفروض************************

تشوف وتسمع وتسكت وتقول الحمد لله انى على ذمة شيء مكتوب فى بطاقته انه ذكر

بس لا كلمة حلوة ولا هدية فى مناسبة ولا حتى يمسك ايديها اللى كان هيتنقط زمان ويلمسها

لا يصرف بما يرضى الله علشان يملى عينيها ويريحها مهما كانت ظروفه حلوة ولا يطبطب عليها لو عيطت ولا فيه اى مل فى تجديد حياتهم اللى بقت عاملة زى بندول الساعه رايح جاى ومبيعملش أى حاجة تانية غير كدة

لا يفرق معاه مكياج وبرفانات ولانجيرى لغاية ما مراته تشك انها بقت مسخ مالوش شكل ولا طعم ولا بيفرق فيها حاجة

لايمكن يمدح أو حتى يذم فى حاجة مراته عملتها لدرجة انها بتشك انه لسه عايش اصلا

هو دة ياجماعه راجل يملا العين

هو الجواز بقى مجرد قسيمة ووقت فى السرير وخلاص .. وطالما الواحد بيرجع يلاقى اكل جاهز وبيت نضيف وست نضيفة يبقى خلاص كدة فل قوى

ولو الست دى احتاجت حاجة أكتر من أكلها تبقى عينها فارغه

وحتى لو عينها فارغة .. هى الرجولة برضو مش معناها انه يملا عين مراته ؟؟

السؤال اللى هيجننى هما ليه مش فاهمين ان عيننا مش بتتملى بالحكاية اياها وبس

مش فاهمين ان الست ليها احتياجات تانية ولازم زى ما الواحد منتظر من مراته انها تلبى احتياجاته لازم هو كمان يلبى احتياجاتها

ليه مش فاهمين ان الكلام والرومانسية والحاجات اللى بيعتبروها تفاهة دى .. ممكن تعمر البيوت وتحيى القلوب وتخلى الواحدة مننا تبيع روحها علشان جوزها

وليه مش فاهمين اننا كنا بناكل ونشرب فى بيوت اهالينا ومتدلعين أخر دلع .. واحتياجنا للغريزة مكنش هو سبب الجواز

واننا اتجوزنا علشان نلاقى اللى يروينا عاطفيا ويشبع احتياجاتنا التافهة اللى بيعاندو معانا ومش عاوزين يعملوها

طيب طالما هى حاجة تافهة وهترضى مراتك .. ايه المشكلة لما تعملها

لسانك هيتقطع لو قولت لمراتك كلمة حلوة .. هتشهر افلاسك لو جيبتلها هدية من أرخص محل فى طريقك

هتموت ناقص عمر لو لقيت مراتك بتعيط وخدتها فى حضنك وطبطبت بدل ما تديها ضهرك وتتخمد ولا تسيب لها البيت وتنزل عند أمك

هيجرى لك حاجة لو صالحتها برسالة موبايل بربع جنيه

طيب ازاى الواحد منهم بيصرف ميات على مكالمات وهدايا ورسايل لواحدة من اياهم يمشى معاها ولا يصاحبها على الفيس ويستخسر فى مراته

بجد والله مش لاقية غير حسبى الله ونعم الوكيل فى أى واحد يحسس مراته بالقهر بس علشان هو مش مقتنع ان ليها حقوق حتى لو كانت من وجهة نظره تافهة

حسبى الله ونعم الوكيل فى أى راجل مش عارف يملا عين مراته ويخليها تفكر فى حاجات عمرها ماكانت تتخيل انها تيجى على بالها فى يوم

حسبى الله ونعم الوكيل